ഷാര്‍ജ സഫാരി സെപ്റ്റംബര്‍ ഇരുപത്തിമൂന്നിന് സന്ദര്‍ശകര്‍ക്കായി തുറക്കും. കൂടുതല്‍ പക്ഷിമൃഗാദികളുമായിട്ടാണ് ഷാര്‍ജ സഫാരിയുടെ പുതിയ സീസണ്‍ ആരംഭിക്കുന്നത്.നാല്‍പ്പത് ദിര്‍ഹം മുതല്‍ ടിക്കറ്റുകള്‍ ലഭ്യമാണ്.ആഫ്രിക്കയ്ക്കുള്ള പുറത്തുള്ള ലോകത്തിലെ ഏറ്റവും വലിയ സഫാരിയാണ് വീണ്ടും സന്ദര്‍ശകരെ സ്വീകരിച്ച് തുടങ്ങുന്നത്. ഷാര്‍ജ സഫാരിയുടെ നാലാമത് സീസണിനാണ് അടുത്ത തിങ്കളാഴ്ച തുടക്കമാകുന്നത്.
120 ഇനങ്ങളിലായി അന്‍പതിനായിരത്തിലധികം മൃഗങ്ങളാണ് ഷാര്‍ജ സഫാരിയില്‍ ഉള്ളത്. പുതിയ സീസണില്‍ മുന്നൂറിലധികം പക്ഷിമൃഗാദികള്‍ കൂടി ഷാര്‍ജ സഫാരിയുടെ ഭാഗമായിട്ടുണ്ട്. ആഫ്രിക്കയിലെ വ്യത്യസ്ഥ മേഖലകള്‍ക്ക് സമാനമായി പന്ത്രണ്ട് മേഖലകളിലായിട്ടാണ് ഷാര്‍ജ സഫാരി വ്യാപിച്ച് കിടക്കുന്നത്. രാവിലെ എട്ടര മുതല്‍ ആറ് മണി വരെയാണ് പ്രവേശനം.ഗോള്‍ഡ്,സില്‍വര്‍,ബ്രോണ്‍സ് എന്നി വിഭാഗങ്ങളില്‍ വ്യത്യസ്ത നിരക്കാണ് പ്രവേശനത്തിന് ഈടാക്കുന്നത്. ബ്രോണ്‍സ് വിഭാഗത്തില്‍ കുട്ടികള്‍ക്ക് പതിനഞ്ചും മുതിര്‍ന്നവര്‍ക്ക് നാല്‍പ്പതും ആണ് നിരക്ക്. സില്‍വര്‍ വിഭാഗത്തില്‍ മുതിര്‍ന്നവര്‍ക്ക് 120 ദിര്‍ഹവും കുട്ടികള്‍ക്കും അന്‍പത് ദിര്‍ഹവും ആണ് നിരക്ക് ഈടാക്കുന്നത്.
ഗോള്‍ഡ് വിഭാഗത്തില്‍ മുതിര്‍ന്നവര്‍ക്ക് 275 ദിര്‍ഹവും കുട്ടികള്‍ക്ക് 120 ദിര്‍ഹം ആണ് നിരക്ക്.ഇത് കൂടാതെ സ്വകാര്യടൂര്‍ പാക്കേജുകളും ലഭ്യമാണ്. ഇതിന് 2250 ദിര്‍ഹം മുതല്‍ 3500 ദിര്‍ഹം വരെയാണ് നിരക്ക്.കുട്ടികള്‍ക്കും കുടുംബങ്ങള്‍ക്കുമായി നിരവധി പരിപാടികളും ഷാര്‍ജ സഫാരി ഒരുക്കിയിട്ടുണ്ട്.സന്ദര്‍ശകര്‍ക്കായി ഭക്ഷണശാലകളും പാര്‍ക്കില്‍ പ്രവര്‍ത്തിക്കുന്നുണ്ട്.
