അഹമ്മദാബാദില്‍ 260-ല്‍ അധികം പേരുടെ ജീവനെടുത്ത എയര്‍ഇന്ത്യ വിമാനപകടത്തില്‍ നിന്നും വിശ്വാസ് കുമാര്‍ രമേഷ് എന്ന വ്യക്തി അല്‍ഭുതകരമായി രക്ഷപെട്ടത് ലോകംമുഴുവന്‍ ശ്രദ്ധിച്ച വാര്‍ത്തയാണ്.ഇതിന് പിന്നാലെ യുഎഇയില്‍ നിന്നും ഇന്ത്യയിലേക്കുള്ള വിമാനടിക്കറ്റ് ബുക്കിംഗുകളില്‍ പതിനൊന്ന് എ സീറ്റിന് ആവശ്യക്കാര്‍ കൂടിയെന്നാണ് ട്രാവല്‍ ഏജന്റുമാര്‍ സാക്ഷ്യപ്പെടുത്തുന്നത്.തകര്‍ന്ന വിമാനത്തില്‍ പതിനൊന്ന് എ സീറ്റില്‍ ആയിരുന്നു വിശ്വാസ് കുമാര്‍ രമേഷ് ഇരുന്നിരുന്നത്.ഇതാണ് ഈ സീറ്റ് തേടി കൂടുതല്‍ യാത്രക്കാര്‍ എത്താന്‍ കാരണം.സുരക്ഷിത സീറ്റെന്നോ ഭാഗ്യസീറ്റെന്നോ കരുതിയാകണം എന്ന യാത്രക്കാര്‍ ഈ ആവശ്യം ഉന്നയിക്കുന്നതെന്നും ട്രാവല്‍ രംഗത്തെ വിദഗദ്ധര്‍ പറയുന്നു.
ഇന്ത്യന്‍ യാത്രക്കാരാണ് എമര്‍ജന്‍സി എക്‌സിറ്റിന് സമീപത്തുള്ള പതിനൊന്ന് എ സീറ്റ് ആവശ്യപ്പെടുന്നത്.ഈ സിറ്റിനായി നൂറോ ഇരുനൂറോ ദിര്‍ഹം അധികമായി നല്‍കുന്നതിനും യാത്രക്കാര്‍ മടിക്കുന്നില്ല.പതിനൊന്ന് എ സീറ്റ് ലഭ്യമല്ലെങ്കില്‍ ആ നിരയിലെ തന്നെ മറ്റ് ഏതെങ്കിലും സീറ്റുകള്‍ക്കും യാത്രക്കാര്‍ ആവശ്യം ഉന്നയിക്കുന്നുണ്ടെന്നും ട്രാവല്‍ ഏജന്‍സികള്‍ അറിയിച്ചു.
