റാസല്‍ഖൈമ രാജ്യാന്തര വിമാനത്താവളത്തില്‍ പുതിയ ടെര്‍മിനല്‍ നിര്‍മ്മിക്കുന്നു. മുപ്പതിനായിരം ചതുരശ്ര മീറ്റര്‍ വിസ്തീര്‍ണത്തിലാണ് പുതിയ ടെര്‍മിനല്‍. പ്രതിവര്‍ഷം മുപ്പത് ലക്ഷം യാത്രക്കാര്‍ക്ക് സേവനം ഒരുക്കുന്നതിനാണ് പദ്ധതി.
എമിറേറ്റിന്റെ വിനോദ സഞ്ചാര വികസനത്തിന് പ്രധാന്യം നല്‍കിയാണ് വിമാനത്താവളത്തിന്റെ നവീകരണ പദ്ധതി തയ്യാറാക്കുന്നത്. രാജ്യത്തെ പ്രധാന വ്യോമയാന ടൂറിസം കേന്ദ്രമായി റാസല്‍ഖൈമയെ മാറ്റുകയാണ് ലക്ഷ്യം. നൂതന സാങ്കേതിക വിദ്യകള്‍ ഉപയോഗിച്ചുള്ള യാത്രാനടപടിക്രമങ്ങള്‍ ഒരുക്കും. ബാഗേജ് ഹാന്‍ഡ്‌ലിങ്, ഇ ഗേറ്റുകള്‍, കസ്റ്റംസ, പൊലീസ് സേവനങ്ങള്‍, ഇമിഗ്രേഷന്‍ എന്നിവയ്ക്കായി പുതിയ സംവിധാനങ്ങള്‍ നടപ്പിലാക്കുമെന്ന് സിവില്‍ എവിയേഷന്റെയും എയര്‍പോര്‍ട്ട് ബോര്‍ഡിന്റെയും ചെയര്‍മാനായ ഷെയ്ഖ് സലേം ബിന്‍ സുല്‍ത്താന്‍ അല്‍ ഖാസിമി അറിയിച്ചു.
നിലവിലുള്ള ടെര്‍മിനലിന്റെ വ്യാപാതി വര്‍ദ്ധിപ്പിച്ചാണ് പുതിയ ടെര്‍മിനലാക്കുന്നത്. സ്വകാര്യ ജെറ്റുകള്‍ക്കായി പ്രത്യേക സൗകര്യങ്ങളും വിമാനത്താവളത്തില്‍ ഒരുക്കും. 2028 ഓടെ നിര്‍മ്മാണം പൂര്‍ത്തിയാക്കുന്നതിനാണ് പദ്ധതി. നവീകരണം പൂര്‍ത്തിയാകുന്നതോടെ കൂടുതല്‍ വിമാന കമ്പനികള്‍ റാസല്‍ഖൈമയില്‍ നിന്നും സര്‍വ്വീസ് ആരംഭിക്കുമെന്നും ഷെയ്ഖ് സലേം ബിന്‍ സുല്‍ത്താന്‍ അല്‍ ഖാസിമി പറഞ്ഞു. ഈ വര്‍ഷം ആദ്യ നാല് മാസത്തിനുള്ളില്‍ 3,32,280 യാത്രക്കാരാണ് വിമാനത്താവളത്തിലൂടെ സഞ്ചരിച്ചത്. മുന്‍ വര്‍ഷത്തെ അപേക്ഷിച്ച് യാത്രക്കാരുടെ എണ്ണത്തില്‍ 28 ശതമാനമാണ് വര്‍ദ്ധന. കാര്‍ഗോ വിമാന സര്‍വ്വീസുകളിലും വര്‍ദ്ധന രേഖപ്പെടുത്തിയിട്ടുണ്ട്.
