സംസ്ഥാന പൊലീസ് മേധാവിയായി റവാഡ ചന്ദ്രശേഖറിനെ നിയമിച്ചു. ഇന്ന് ചേര്‍ന്ന മന്ത്രിസഭാ യോഗത്തിലാണ് തീരുമാനം. 1991 ബാച്ചിലെ ഐപിഎസ് ഉദ്യോഗസ്ഥനാണ് ആന്ധ്രാപ്രദേശ് വെസ്റ്റ് ഗോദാവരി സ്വദേശിയായ റവാഡ ചന്ദ്രശേഖര്‍
സംസ്ഥാനത്തിന്‌റെ നാല്‍പ്പത്തിയൊന്നാമത്തെ ഡിജിപിയാണ് റവാഡ ചന്ദ്രശേഖര്‍. കേന്ദ്ര ഡെപ്യൂട്ടേഷനില്‍ നിന്നാണ് റവാഡ സംസ്ഥാന പൊലീസ് മേധാവി സ്ഥാനത്തേക്ക് എത്തുന്നത്. ഡിജിപിമാരില്‍ ഏറ്റവും സീനിയറായ, പട്ടികയില്‍ ഒന്നാമനായിരുന്ന നിധിന്‍ അഗര്‍വാളിനാണ് സംസ്ഥാന പോലീസ് മേധാവി സ്ഥാനത്തേയ്ക്ക് സാധ്യത കല്‍പിച്ചിരുന്നത്. പട്ടികയില്‍ മൂന്നാമനായ യോഗേഷ് ഗുപ്തയ്ക്ക് സര്‍ക്കാരുമായുള്ള മോശം ബന്ധമാണ് തിരിച്ചടിയായത് എന്നാണ് വിലയിരുത്തല്‍. നിലവിലെ ഡിജിപി എസ് ദര്‍വേഷ് സാഹിബ് ഇന്ന് സ്ഥാനമൊഴിയും.
റവാഡ ചന്ദ്രശേഖര്‍ സംസ്ഥാന പൊലീസ് മേധാവിയായി ഇന്നോ നാളെയോ ചുമതലയേല്‍ക്കുമെന്നാണ് വിവരം. ഔദ്യോഗിക തീരുമാനം ഇന്നാണ് പുറത്ത് വന്നതെങ്കിലും ശനിയാഴ്ച വൈകിട്ടോടെ സംസ്ഥാന സര്‍ക്കാരിന്‌റെ അറിയിപ്പ് റവാഡ ചന്ദ്രശേഖറിന് ലഭിച്ചിരുന്നു. രണ്ടാഴ്ച മുമ്പ് റവാഡ മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തിയിരുന്നു. 2026 ജൂലൈ അവസാനം വരെയാണ് ചന്ദ്രശേഖറിന് സര്‍വീസ്. എന്നാല്‍ സുപ്രിംകോടതി ഉത്തരവ് അനുസരിച്ച് ഒരു വര്‍ഷം കൂടി സര്‍വീസ് കലാവധി ലഭിക്കും.
