യുഎഇയില്‍ മെയ് മാസത്തെ ഇന്ധനവില പ്രഖ്യാപിച്ചു: പെട്രോള്‍ ഒരു ഫില്‍സ് കൂടി, ഡീസലിന് 11 ഫില്‍സ് കുറച്ചു.

അബുദബി: യുഎഇയില്‍ മെയ് മാസത്തെ ഇന്ധനവില പ്രഖ്യാപിച്ചു. പെട്രോള്‍ ലിറ്റിന് ഒരു ഫില്‍സ് വര്‍ദ്ധിപ്പിച്ചു. ഡീസല്‍ ലിറ്ററിന് പതിനൊന്ന് ഫില്‍സ് വില കുറച്ചു. പുതുക്കിയ വില ഇന്ന് അര്‍ദ്ധരാത്രി പ്രാബല്യത്തില്‍ വരും. യുഎഇ ഊര്‍ജ്ജ മന്ത്രാലയത്തിന് കീഴിലെ ഇന്ധനവില നിര്‍ണയ സമിതിയാണ് മെയ് മാസത്തെ പുതുക്കിയ ഇന്ധനവില പ്രഖ്യാപിച്ചത്. സൂപ്പര്‍ 98 പെട്രോളിന് 2 ദിര്‍ഹം 58 ഫില്‍സാണ് മെയ് മാസത്തെ വില. ഏപ്രിലില്‍ ഇത് 2 ദിര്‍ഹം 57 ഫില്‍സായിരുന്നു. സ്‌പെഷ്യല്‍ 95 പെട്രോളിന് 2 ദിര്‍ഹം 46 ഫില്‍സില്‍ നിന്നും 2 ദിര്‍ഹം 47 ഫില്‍സായി വില വര്‍ദ്ധിച്ചു. ഇ പ്ലസ് 91 പെട്രോളിന് 2 ദിര്‍ഹം 39 ഫില്‍സാണ് പുതുക്കിയ വില. ഏപ്രിലില്‍ ഇത് 2 ദിര്‍ഹം 38 ഫില്‍സായിരുന്നു. ഡീസല്‍ ലിറ്ററിന് 2 ദിര്‍ഹം 63 ഫില്‍സില്‍ നിന്നും 2 ദിര്‍ഹം 52 ഫില്‍സായി വില കുറച്ചു. രാജ്യാന്തര വിപണിയില്‍ അസംസ്‌കൃത എണ്ണവിലയില്‍ ഉണ്ടാകുന്ന മാറ്റമാണ് യുഎഇയിലും എണ്ണവിലയില്‍ പ്രതിഫലിക്കുന്നത്.