യുഎഇയില്‍ പൊടിപടലങ്ങള്‍ നിറഞ്ഞ അന്തരീക്ഷം, താപനില ഉയരും

അബുദബി: ഈ വാരാന്ത്യം വരെ പൊടിപടലങ്ങള്‍ നിറഞ്ഞ അന്തരീക്ഷവും ഉയര്‍ന്ന താപനിലയും അനുഭവപ്പെടുമെന്ന് ദേശീയ കാലാവസ്ഥാ നിരീക്ഷണ കേന്ദ്രം. ഇന്ന് പകല്‍ സമയങ്ങളിലെ ഉയര്‍ന്ന താപനില 44 ഡിഗ്രി സെല്‍ഷ്യസ് രേഖപ്പെടുത്തി. പകല്‍ സമയങ്ങളില്‍ മേഘാവൃതമായ കാലാവസ്ഥ അനുഭവപ്പെടും. രാജ്യത്ത് ചൂട് വര്‍ദ്ധിക്കുന്നതിനും സാധ്യതയുള്ളതായി ദേശീയ കാലാവസ്ഥാ കേന്ദ്രം അറിയിച്ചു. രാജ്യത്തിന്റെ പര്‍വ്വത പ്രദേശങ്ങളിലും വടക്ക് പടിഞ്ഞാറന്‍ മേഖലകളിലും കനത്ത ചൂടാണ് അനുഭവപ്പെടുന്നത്. കഴിഞ്ഞ ദിവസങ്ങളില്‍ വിവിധ എമിറേറ്റുകളില്‍ ലഭിച്ച നേരിയ മഴ ചൂടിന് അല്‍പം ആശ്വാസം നല്‍കിയെങ്കിലും അടുത്ത ദിവസങ്ങളില്‍ ഉയര്‍ന്ന താപനിലയാണ് രേഖപ്പെടുത്തുന്നത്. രാത്രിയില്‍ അന്തരീക്ഷ ഈര്‍പ്പവും ഉയര്‍ന്ന നിലയിലാണ്. പുലര്‍ച്ചെ മൂടല്‍ മഞ്ഞും അനുഭവപ്പെടുന്നതായി ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു.