പ്രഥമ ദോഹ ലീഗല് ഫോറം ഖത്തര് പ്രധാനമന്ത്രി ഷെയ്ഖ് മുഹമ്മദ് ബിന് അബ്ദുള്റഹ്മാന് ബിന് ജാസിം അല്-താനി ഉദ്ഘാടനം ചെയ്തു. 13 രാജ്യങ്ങളില് നിന്നായി 40 നിയമവിദഗ്ധരാണ് ലീഗല് ഫോറത്തില് പങ്കെടുക്കുന്നത്.
‘ഉയര്ന്നുവരുന്ന പ്രവണതകളും ഭാവിയിലേക്കുള്ള ഉള്ക്കാഴ്ചകളും’ എന്ന വിഷയത്തില് ആണ് പ്രഥമ ദോഹ ലീഗല് ഫോറം സംഘടിപ്പിച്ചിരിക്കുന്നത്. ഖത്തര് ഇന്റര്നാഷണല് കോര്ട്ട് ആന്ഡ് ഡിസ്പ്യൂട്ട് റെസല്യൂഷന് സെന്ററുമായി സഹകരിച്ച് നീതിന്യായ മന്ത്രാലയം ആണ് പരിപാടി സംഘടിപ്പിക്കുന്നത്. പരിപാടിയില്, നിയമം, ഭരണം, തര്ക്ക പരിഹാരം എന്നിവയിലെ നൂതനാശയങ്ങള് പര്യവേക്ഷണം ചെയ്യുന്നതിനായി ലോകമെമ്പാടുമുള്ള നിയമ, നീതിന്യായ വിദഗ്ധരാണ് പങ്കെടുക്കുന്നത്. രണ്ട് ദിവസങ്ങളിലായി നടക്കുന്ന ദോഹ ലീഗല് ഫോറം 2026, 13 രാജ്യങ്ങളെ പ്രതിനിധീകരിച്ച് 40 വിദഗ്ധര് പങ്കെടുക്കും. പ്ലീനറി സെഷനുകളും മൂന്ന് പ്രത്യേക റൗണ്ട് ടേബിള് ചര്ച്ചകളും ഫോറത്തിന്റെ ഭാഗമായി നടക്കും. ഡിജിറ്റല് പരിവര്ത്തനം, അന്താരാഷ്ട്ര മധ്യസ്ഥത, അതിര്ത്തി കടന്നുള്ള വ്യാപാരം, ഊര്ജ്ജ മേഖല, പൊതു-സ്വകാര്യ പങ്കാളിത്ത കരാറുകള് എന്നിവയുള്പ്പെടെ നിയമത്തിന്റെ ഭാവി രൂപപ്പെടുത്തുന്ന പ്രധാന വിഷയങ്ങള് അജണ്ടയില് ഉള്പ്പെടുന്നു. ഖത്തര് നാഷണല് വിഷന് 2030, മൂന്നാം നാഷണല് ഡെവലപ്മെന്റ് സ്ട്രാറ്റജി 2024-2030 എന്നിവയുമായി യോജിപ്പിച്ചുകൊണ്ട്, ആഗോള പരിവര്ത്തനത്തിന്റെ ഒരു യുഗത്തില് സമൃദ്ധിക്കും പരസ്പര വിശ്വാസത്തിനും വേണ്ടിയുള്ള ഒരു പാലമായി അന്താരാഷ്ട്ര സഹകരണം മുന്നോട്ട് കൊണ്ടുപോകുന്നതിനും നിയമം പ്രോത്സാഹിപ്പിക്കുന്നതിനുമുള്ള ഒരു വേദിയും ഫോറം നല്കുന്നു.
പ്രഥമ ദോഹ ലീഗല് ഫോറം പ്രധാനമന്ത്രി ഉദ്ഘാടനം ചെയ്തു
