ജനസംഖ്യാ വര്‍ദ്ധനവിന് ആനുപാതികമായി ദുബൈയില്‍ വന്‍ റോഡ് വികസനപദ്ധതികള്‍ നടപ്പാക്കുന്നു.അന്‍പത്തിയേഴ് പദ്ധതികള്‍ ആണ് 2027-ഓട് കൂടി നടപ്പാക്കുക.ചില തിരക്കേറിയ പാതകളില്‍ യാത്രസമയത്തില്‍ എഴുപത്തിയഞ്ച് ശതമാനം വരെ കുറവ് വരുത്താന്‍ കഴിയും വിധത്തിലാണ് നവീകരണം
ദുബൈ കിരീടവകാശിയും യുഎഇ ഉപപ്രധാനമന്ത്രിയുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തുമിന്റെ മേല്‍നോട്ടത്തില്‍ ആണ് എമിറേറ്റില്‍ റോഡ് വികസനം നടപ്പാക്കുന്നത്.2040-ഓട് കൂടി എമിറേറ്റിലെ ജനസംഖ്യ എണ്‍പത് ലക്ഷമായി ഉയരും എന്നാണ് കണക്കാക്കുന്നത്.ഇതിന് ആനുപാതികമായിട്ടാണ് റോഡ് വികസനം നടപ്പാക്കുന്നത്.226 കിലോമീറ്റര്‍ ദൂരത്തില്‍ പുതിയ പാതകളും 115 പുതിയ പാലങ്ങളും നിര്‍മ്മിക്കുന്നതിന് ആണ് തീരുമാനം.ഗതാഗത വികസപദ്ധതികള്‍ ഷെയ്ഖ് ഹംദാന്‍ അടുത്തിടെ വിലയിരുത്തിയിരുന്നു.എമിറേറ്റിലെ പ്രധാനമേഖലകളെ കൂടുതല്‍ ബന്ധിപ്പിക്കുന്നതിനും ഗതാഗതതിരക്ക് കുറയ്ക്കുന്നതിനുമായി പതിനൊന്ന് പ്രാഥമിക റോഡ് ഇടനാഴികള്‍ നവീകരിക്കുന്നതിനുള്ള പദ്ധതിയുടെ ഭാഗമായിട്ടാണ് വികസനങ്ങള്‍.
ഉംസൂഖിം-അല്‍ ഖുദ്‌റ ഇടനാഴിയില്‍ പതിനാറ് കിലോമീറ്ററില്‍ ആണ് നവീകരണം.ഏഴായിരം മീറ്റര്‍ നീളത്തില്‍ പാലങ്ങളും തുരങ്ഹകളും നിര്‍മ്മിക്കും.പത്ത് ലക്ഷം താമസക്കാര്‍ക്ക് ഉപകാരപ്പെടുന്ന വികസനപദ്ധതി മൂന്ന് ഘട്ടങ്ങളായിട്ടാണ് നടപ്പാക്കുന്നത്.ഹെസ്സ സ്ട്രീറ്റ്,അല്‍ ഫേ റോഡ് ഇടനാഴി എന്നിവടങ്ങളിലും നവീകരണം നടപ്പാക്കും.റോഡ് വികസനത്തിന് ഒപ്പം സൈക്കിള്‍ ട്രാക്കുകളും വര്‍ദ്ധിപ്പിക്കുകയാണ് ദുബൈ.557 കിലോമീറ്റര്‍ സൈക്കള്‍ ട്രാക്ക് ഇതിനകം നിര്‍മ്മിച്ചുകഴിഞ്ഞു.100 കിലോമീറ്റര്‍ ദൂരത്തില്‍ നിര്‍മ്മാണം പുരോഗമിക്കുകയാണ്.ഇത് കൂടാതെ 145 കിലോമീറ്റര്‍ ദൂരത്തില്‍ കൂടി സൈക്കിള്‍ ട്രാക്ക് നിര്‍മ്മിക്കും.
