ഷാര്‍ജയില്‍ പത്ത് വര്‍ഷത്തിലധികം പഴക്കമുള്ള ഗതാഗത നിയമലംഘന കേസുകള്‍ റദ്ദാക്കുന്നതിലൂടെ ആറ് ലക്ഷത്തിലധികം കേസുകള്‍ ഒഴിവാകുമെന്ന് പൊലീസ്. കേസുകള്‍ റദ്ദാക്കുന്നതിന് അപേക്ഷയ്‌ക്കൊപ്പം ആയിരം ദിര്‍ഹം ഫീസ് അടക്കണം. ഷാര്‍ജ എക്‌സിക്യൂട്ടീല് കൗണ്‍സിലിന്റേതാണ് തീരുമാനം.
പ്രത്യേക വ്യവസ്ഥകള്‍ പാലിച്ചാണ് പത്ത് വര്‍ഷത്തിലധികം പഴക്കമുള്ള ഗതാഗത നിയമലംഘന കേസുകള്‍ ഒഴിവാക്കുന്നതിന് അവസരം. നിയമങ്ങള്‍ പാലിക്കുകയും റോഡ് സുരക്ഷ വര്‍ദ്ധിപ്പിക്കുകയും ചെയ്യുന്നതിന്റെ ഭാഗമായാണ് പുതിയ തീരുമാനം. ട്രാഫിക് ആന്റ് ലൈസന്‍സിംഗ് സര്‍വ്വീസ് സെന്ററില്‍ എത്തി നടപടിക്രമങ്ങള്‍ പൂര്‍ത്തിയാക്കണമെന്നാണ് നിര്‍ദ്ദേശം. ഇളവിന് അപേക്ഷിക്കുന്നവര്‍ ആയിരം ദിര്‍ഹം അപേക്ഷ ഫീസ് നല്‍കണം. രജിസ്‌ട്രേഷന്‍ കാലാവധി അവസാനിച്ച 44000 വാഹനങ്ങള്‍ എമിറേറ്റിലുണ്ട്. വാഹന ഉടമകള്‍ ഗതാഗത പിഴകള്‍ അടക്കണമെന്നാണ് നിര്‍ദ്ദേശം.
ഗതാഗത പിഴകള്‍ അടക്കാത്തവര്‍ക്ക് അവരുടെ പേരില്‍ പുതിയ വാഹനം രജിസ്റ്റര്‍ ചെയ്യുന്നതിനോ നിലവിലെ വാഹനം പുതുക്കുന്നതിനോ സാധിക്കില്ല. നിയമലംഘനങ്ങള്‍ വ്യക്തികളുടെ പേരിലും ചുമത്തപ്പെടുമെന്ന് ട്രാഫിക് ആന്റ് പട്രോള്‍സ് ഡിപ്പാര്‍ട്ട്‌മെന്റ് ഡയറക്ടര്‍ ജനറല്‍ മുഹമ്മദ് അലൈ അല്‍ നഖ്ബി പറഞ്ഞു. വാഹന ഉടമ മരണപ്പെടുകയോ, പത്ത് വര്‍ഷമായി വാഹന ഉടമ രാജ്യത്ത് എത്താതിരിക്കുക, വാഹന ഉടമയ്ക്ക് തിരികെ രാജ്യത്തേയ്ക്ക് എത്താന്‍ കഴിയാതിരിക്കുക തുടങ്ങിയ സാചര്യങ്ങളില്‍ ഫീസ് ഈടാക്കാതെ കേസുകള്‍ റദ്ദാക്കും.
