ഖത്തറിലെ അമേരിക്കന്‍ സൈനിക താവളം ലക്ഷ്യമിട്ട് ഇറാന്‍ തൊടുത്തത് പത്തൊന്‍പത് മിസൈലുകള്‍.ഇതില്‍ ഒരെണ്ണം മാത്രമാണ് സൈനിക താവളത്തില്‍ വീണത്.ഇറാന്റെ ആക്രണശ്രമത്തില്‍ നാശനഷ്ടങ്ങള്‍ ഇല്ലെന്ന ഖത്തര്‍ സായുധ സേന അറിയിച്ചു.രണ്ട് ഘട്ടങ്ങളായിട്ടാണ് ഇറാന്‍ ദോഹയിലെ അമേരിക്കയുടെ അല്‍ഉദൈദ് വ്യോമതാവള ലക്ഷ്യമിട്ട് മിസൈലാക്രമണം നടത്തിയത്.ആദ്യ പതിനൊന്ന് മിസൈലുകള്‍ ആണ് തൊടുത്ത്.മിസൈലുകള്‍ എത്തുന്നതായി ഖത്തറിന്റെ വ്യോമനിരീക്ഷണ സംവിധാനങ്ങള്‍ കണ്ടെത്തി.ഖത്തറിന്റെ വ്യോമമേഖലയിലേക്ക് പ്രവേശിച്ചതിന് പിന്നാലെ പ്രതിരോധ സംവിധാനങ്ങള്‍ മിസൈലുകള്‍ നശിപ്പിച്ചതായി സായുധ സേന സേന ജോയിന്റ് ഓപ്പറേഷന്‍സ് ഉപമേധാവി ഷയിഖ് അല്‍ ഹജ്രി അറിയിച്ചു.മിനുട്ടുകള്‍ക്കുള്ളില്‍ പന്ത്രണ്ട് മിസൈലുകളും ഖത്തറിലേക്ക് ഇറാന്‍ തൊടുത്തു.ഇതില്‍ പതിനൊന്ന് എണ്ണവും വ്യോമപ്രതിരോധ സംവിധാനം തകര്‍ത്തു.
രണ്ടാംഘട്ടം എത്തിയ മിസൈലുകളില്‍ ഒന്ന് യു.എസ് വ്യോമതാവളത്തില്‍ വീണു.മിസൈല്‍ പതിച്ച സ്ഥലത്ത് നേരിയ തോതില്‍ തീപിടുത്തം ഉണ്ടായെങ്കിലും കാര്യമായ നാശനഷ്ടങ്ങള്‍ ഇല്ല.നിലവില്‍ സ്ഥിതിഗതികള്‍ സാധാരണനിലയിലേക്ക് എത്തിയെന്നും ആശങ്കപ്പെടേണ്ട ഒരു സാഹചര്യവും ഇല്ലെന്നും ഖത്തര്‍ ഭരണകൂടം അറിയിച്ചു.ഇറാന്റെ മിസൈലാക്രമണത്തിന് പിന്നാലെ അടച്ച വ്യോമപാത ഇന്നലെ രാത്രി തന്നെ തുറന്നു.സാധാരണജനജീവിതത്തിന് ഭീഷണി സൃഷ്ടിക്കുന്ന ഒരു സാഹചര്യവും നിലവില്‍ ഇല്ലെന്ന് ഖത്തര്‍ വിദേശകാര്യമന്ത്രാലയ വക്താവ് മജീത് അല്‍ അന്‍സാരി അറിയിച്ചു.
