യുഎഇയില്‍ തൊഴില്‍ ലഭിക്കുന്നവര്‍ സ്ഥാപനങ്ങള്‍ നല്‍കുന്ന ഓഫര്‍ ലെറ്ററുകള്‍ യഥാര്‍ത്ഥമാണെന്ന് പരിശോധിച്ച് ഉറപ്പാക്കണമെന്ന് മാനവവിഭവശേഷി സ്വദേശിവത്കരണ മന്ത്രാലയം. തൊഴില്‍ തട്ടിപ്പുകളില്‍ ഇരയാകാതിരിക്കുന്നതിനാണ് മുന്നറിയിപ്പ്. മന്ത്രാലയത്തിന്റെ ഓണ്‍ലൈന്‍ പ്ലാറ്റ്‌ഫോമുകളിലൂടെ പരിശോധിക്കാന്‍ സാധിക്കും.
യുഎഇയിലേക്ക് രാജ്യത്തു നിന്നും പുറത്തു നിന്നും തൊഴില്‍ തേടുന്നവര്‍ക്കാണ് മാനവവിഭവശേഷി സ്വദേശിവത്കരണ മന്ത്രാലയത്തിന്റെ നിര്‍ദ്ദേശം. തൊഴില്‍ ലഭിക്കുന്നവര്‍ സ്ഥാപനത്തിന്റെ ആധികാരികത പരിശോധിച്ച് ഉറപ്പാക്കണം. കമ്പനികള്‍ നല്‍കുന്ന ഓഫര്‍ ലെറ്റര്‍ യഥാര്‍ത്ഥമാണോ എന്ന് അറിയുന്നതിനും തൊഴില്‍ തട്ടിപ്പില്‍പ്പെടാതിരിക്കുന്നതിനുമാണ് നിര്‍ദ്ദേശം. സ്ഥാപങ്ങള്‍ ഓഫര്‍ ലെറ്ററുകള്‍ മാനവവിഭവശേഷി സ്വദേശി വത്കരണ മന്ത്രാലയം വഴി നല്‍കണം. തൊഴിലുടമകള്‍ മന്ത്രാലയത്തിന്റെ കരാര്‍ അപേക്ഷ വഴിയാണ് വര്‍ക്ക് പെര്‍മിറ്റിനായി അപേക്ഷിക്കേണ്ടത്. ഈ ലെറ്ററുകളില്‍ സീരിയില്‍ നമ്പറുകളും ബാര്‍കോഡുകളും ഉണ്ടാകും. ഇത് പരിശോധിച്ച് ഉറപ്പാക്കാം. ജോലിയുടെ രീതി, ശമ്പളം, ആഴ്ചയിലുള്ള അവധി, നോട്ടീസ് പീരിയഡും മറ്റ് വ്യവസ്ഥകളും, ജോലിയില്‍ പ്രവേശിക്കുന്ന തിയതി, പദവി, കമ്പനിയുടെ നമ്പര്‍ എന്നിവ സാധുവായ എല്ലാ ഓഫര്‍ ലെറ്ററിലും ഉള്‍പ്പെടുത്തണം.
മാനവവിഭവശേഷി സ്വദേശിവത്കരണ മന്ത്രാലയത്തിന്റെ വെബ്‌സൈറ്റ് വഴി ഈ ലെറ്റര്‍ പരിശോധിച്ച് ഉറപ്പാക്കാം. വെബ്‌സൈറ്റില്‍ സര്‍വ്വീസസ് വിഭാഗത്തില്‍ അന്വേഷണങ്ങള്‍ക്കായുള്ള വിഭാഗത്തില്‍ പ്രവേശിച്ചാല്‍ തൊഴില്‍ കരാറിന്റെ സാധുത പരിശോധിക്കാന്‍ സാധിക്കും. തുടര്‍ന്ന് വെബ്‌സൈറ്റില്‍ ആവശ്യപ്പെട്ടുന്ന വിശദാംശങ്ങളില്‍ ഓഫര്‍ ലെറ്ററില്‍ നിന്നും ടൈപ്പ് ചെയ്ത് നല്‍കണം. യഥാര്‍ത്ഥ കരാറാണെങ്കിലും വ്യാജമാണെങ്കിലും വെബ്‌സൈറ്റിലൂടെ അറിയിക്കും. തൊഴില്‍ തേടി എത്തുന്നവര്‍ തട്ടിപ്പിന് ഇരയാകുന്ന സാഹചര്യത്തിലാണ് മന്ത്രാലയം നിര്‍ദ്ദേശം നല്‍കിയിരിക്കുന്നത്..
