ഒമാനില്‍ മലവെള്ളപ്പാച്ചിലില്‍ ഒഴിക്കില്‍പെട്ട് കാണാതായ മൂന്ന് യുഎഇ പൗരന്‍മാരുടെ മൃതദേഹം കണ്ടെത്തി. നാല് പേരെ പരുക്കുകളോടെ രക്ഷപെടുത്തി.
ഒമാനിലെ മുറൈമിയിലാണ് മൂന്ന് ഇമാറാത്തികള്‍ ഒഴുക്കില്‍പ്പെട്ടത്.
മുറൈമിയിലെ വിലായത് മഹദായില്‍ ഇവരുടെ വാഹനങ്ങള്‍ മഴവെള്ളപ്പാച്ചിലില്‍ അകപ്പെടുകയായിരുന്നു. രണ്ട് കാറുകളിലായി ഏഴ് പേരാണ് ഉണ്ടായിരുന്നത്. നാല് പേരെ സിവില്‍ ഡിഫന്‍സ് രക്ഷപെടുത്തി. കാണാതായ മൂന്ന് പേരില്‍ ഒരാളുടെ മൃതദേഹം ഇന്നലെ രാത്രിയും രണ്ട് പേരുടെ മൃതദേഹം ഇന്നും കണ്ടെത്തുകയായിരുന്നു.
ഒമാന്റെ വടക്കന്‍ ഗവര്‍ണറേറ്റുകളിലാണ് ഇന്നലെ ശക്തമായ മഴ അനുഭവപ്പെട്ടത്. ഉച്ചയോട് കൂടി ആരംഭിച്ച മഴ വൈകിട്ടോടെ ശക്തിപ്പെടുകയായിരുന്നു. ശക്തമായ മഴയെ തുടര്‍ന്ന് വാദികള്‍ നിറഞ്ഞ് ഒഴുകുകയും താഴ്‌വാരങ്ങളിലേക്ക് മഴവെള്ളപ്പാച്ചിലും ഉണ്ടായി. രാജ്യത്ത് കൂടുതല്‍ മഴയ്ക്ക് സാധ്യതയുണ്ടെന്നാണ് കാലാവസ്ഥാ കേന്ദ്രം മുന്നറിയിപ്പ് നല്‍കിയിട്ടുള്ളത്.
