ഫ്രഞ്ച് രാജ്ഞിയുടെ കൈചെയിനുകള്‍ ലേലത്തിന്, വില 29.5 കോടി!

ഫ്രഞ്ച് രാജ്ഞി ആയിരുന്ന മേരി ആന്റോനെറ്റിന്റെ കൈചെയിനുകള്‍ ലേലത്തിന്. 1776ൽ പാരിസിലെ പ്രമുഖ വ്യവസായിയായ ചാൾസ് ഓഗസ്റ്റ് ബൊമറിൽനിന്നാണ് മേരി കൈച്ചെയിനുകൾ സ്വന്തമാക്കിയതെന്നാണു ലഭ്യമായ വിവരം. ഈ വർഷം നവംബർ ഒമ്പതിനു ജനീവയിലാണ് ലേലം നടക്കുക. 112 ഡയമണ്ടുകളാണ് കൈച്ചെയിനുകളിലുള്ളത്. ഇരു ചെയിനുകളും ഒരുമിച്ചാകും ലേലം ചെയ്യുക. ഇന്ത്യ രൂപ ഏകദേശം 29.5 കോടിയാണ് വില പ്രതീക്ഷിക്കുന്നത്.

നൂറു കണക്കിനാളുകളാണ് ലേലത്തിൽ താൽപര്യം പ്രകടിപ്പിച്ചിരിക്കുന്നത്. ലേലത്തിൽ ആളുകൾ വർധിച്ചാൽ വില ഇനിയും കൂടാനാണു സാധ്യത. എത്ര രൂപയ്ക്കു കൈച്ചെയിനുകൾ ലേലം ചെയ്യപ്പെടുമെന്നാണു ഇനി അറിയേണ്ടത്. അടുത്തിടെ ജനീവയിൽ നടന്ന ആഭരണ ലേലങ്ങളെല്ലാം പ്രതീക്ഷിച്ചതിലും മികച്ച നേട്ടം വിൽപ്പനക്കാർക്കു സമ്മാനിച്ചെന്നാണു കണക്കുകൾ വ്യക്തമാക്കുന്നത്. 2018ൽ ഫ്രഞ്ച് രാജ്ഞിയുടെ ഡയമണ്ട് മാല 14 കോടി രൂപയ്ക്കാണ് ജനീവയിൽ വിൽപ്പനയ്ക്കു വച്ചിരുന്നത്. എന്നാൽ വിറ്റുപോയത് 264 കോടി രൂപയ്ക്കാണ്. കൈച്ചെയിനുകളുടെ കാര്യത്തിലും ഇതേ നീക്കമുണ്ടാകുമെന്നാണു വിലയിരുത്തൽ. ഫ്രഞ്ച് വിപ്ലവത്തിനു മുമ്പുള്ള അവസാന രാജ്ഞിയാണ് മേരി ആന്റോനെറ്റ് എന്ന പ്രത്യേകതയും ലേലത്തിനു മാറ്റു കൂട്ടുന്നുണ്ട്. രണ്ടു കൈച്ചെയിനുകളും കൂടി 140- 150 കാരറ്റ് വരുമെന്നാണു വിലയിരുത്തൽ. മൂന്നു നിരകളിലായി തയറാക്കിയിരിക്കുന്ന കൈച്ചെയിനുകൾ കൂട്ടിയോജിച്ച് മാലയായും അണിയാം.

Must see news